О Пресвятая Госпоже Владычице Богородице! Вышши еси всех ангел и архангел, и всея твари честнейши: помощница еси обидемых, ненадеющихся надеяние, убогих заступница, печальных утешение, алчущих кормительница, нагих одеяние, больных исцеление, грешных спасений, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй православный народ наш, святейший правительствующий синод, и преосвященныя митрополиты, архиепископы и епископы , и весь священнический и иноческий чин, и благоверных правительствующий сигклит, и военачальники, градоначальники и христолюбивое воинство, и доброхоты, и вся православныя христиане ризою Твоею честною защити: умоли , Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякого зла. Подаждь, Госпоже, мир и здравие рабом Твоим, всем православным христианам, и просвети им ум и очи сердечныя, еже ко спасению: сподоби ны, грешныя рабы Твоя, Царствия Сына Твоего, Христа Бога нашего: яко держава Его благословлена и препрославлена, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.

Аминь.